कोरोना भाइरस (कोभिड १९) महामारीले शहरमा जनजीवन कठीन बनाइरहँदा नेपालका हिमालहरु भने निकै व्यस्त रहे । सम्भवत यस पटक कोरोना महामारीले रोक्न नसकेको थोरैमध्ये पर्वतारोहण क्षेत्र रह्यो । कोरोना भाइरस बेस क्याम्पसम्म पुगेको खबरका बाबजुद आरोहीहरु रोकिएनन् ।
गत वर्ष भाइरस महामारीकै कारण मुख्य सिजनमै ठप्प बनेको नेपालको पर्वतारोहण यो वर्ष भने सामान्य अवस्थाको जस्तै सञ्चालन भयो । पछिल्ला केही दिनदेखि दैनिक सयभन्दा बढीको संख्यामा आरोहीहरुले विश्वको सर्वाेञ्च शिखर सगरमाथाको चुचुरोमा आफ्नो पाइला पुराएका छन् ।
त्यो संख्यामा ४३ वर्षिय पिके (पूर्णकुमार) शेर्पा र उनका छोरा १७ वर्षिय सोनम शेर्पा पनि रहे । यो सिजनको सबै आरोहणमध्ये यी बाउ छोराको जोडीको आरोहण धेरै तरिकाले फरक छ ।
सगरमाथाको उचाई झण्डै एक मिटर (०.८६ मिटर) ले बढेर आठ हजार आठ सय ४८ दशमलव ८६ मिटर पुगेपछि सफल आरोहण गर्ने सोनम कान्छो आरोही बने । यस्तै, बाबु छोराको पहिलो जोडी पनि ।
तर, लामो समयदेखि जलवायू परिवर्तनविरुद्ध अभियान चलाउदै आएका यी बाउ छोरा व्यक्तीगत उपलव्धीभन्दा पनि आफ्नो अभियान महत्वपूर्ण रहेको सुनाउँछन् । सगरमाथाको सफल आरोहण गरी फर्कदै गरेका पिकेले आधार शीविरबाट आफ्नो अभियानको पहिलो पाइला सफल भएको बताए ।
यसअघि सगरमाथाको सरसफाईकै लागि दुई पटक आरोहण गरिसकेका पिकेले यस पटक भने जलवायू परिवर्तनविरुद्धको सन्देश लिएर सगरमाथाको आरोहण गरे । वास्तवमा उनले जलवायू परिवर्तनविरुद्ध एउटा ठूलो अभियाननै तय गरेका छन् ।
उनी जलवायू परिवर्तनविरुद्धको सन्देश लिएर आफ्नो छोरासहित सातै महादेशको हिमाल आरोहण गर्दै छन् । त्यसको सुरुवात एसियाबाट गरेका हुन्, सगरमाथाको सफल आरोहणमार्फत ।
उनकाअनुसार यो अभियानमा छोराको सहभागिताको फरक महत्व छ । उनी भन्छन्, ‘जलवायू परिवर्तनविरुद्धको अभियान पुस्तौसम्म चल्ने छ । यो अभियान हामीले अर्काे पुस्तालाई पनि हस्तान्तरण गर्न आवश्यक छ । त्यही भएर मेरो अर्काे पुस्ता छोरालाई पनि यो अभियानमा साथै लिएर हिडेको छु ।’
बाबुको यो अभियानमा छोरा सोनम पनि सहमत छन् । वास्तवमा यो अभियान लिएर सगरमाथाको आरोहण गर्ने प्रस्ताव छोरा सोनमको हो । ‘बुबा पहिलेदेखि नै यो अभियानमा हुनुहुन्छ । म आफै पनि पर्यटन क्षेत्रमा संलग्न भएको केही वर्ष भइसकेको छ । बुवाले सुरु गर्नुभएको यो अभियान र आफै पर्यटन क्षेत्रमा संलग्न भएपछि जलवायू परिवर्तनले प्रकृतीमा धेरै ठूलो असर पारिसकेको पाएँ’, सोनम भन्छन्, ‘त्यसैले यो अभियानलाई अझ बृहत रुपमा अघि बढाउन आवश्यक छ भन्ने महसुस् भयो । त्यसअनुसार सगरमाथा आरोहणको योजना बनेको हो ।’
पिकेका अनुसार उनीहरुको यो अभियानमा अरु सहयोगहीहरु पनि जोडिएका छन्, जसले अन्य महादेशमा काम गरिरहेका छन् । ‘अन्य महादेशमा हामीले आरोहण गर्ने हिमालको टुङ्गो लाग्न बाँकी छ । यद्यपि, त्यहाँ साथीहरुले तयारी गर्दै हुनुहुन्छ । आरोहणको सम्पूर्ण व्यवस्थापन, प्रचार त्यहाकै साथीहरुले हेर्दै हुनुहुन्छ’, पिके भन्छन्, ‘सबै कुरा निश्चित भएपछि आरोहणका लागि जाने छौं । त्यसबाट हाम्रो अभियानले अझ सफलता प्राप्त गरेको महसुस् गर्ने छौं ।’
